9

کرونا: سعودیہ میں سخت قوانین نافذ، غیر ملکیوں کو خلاف ورزی پر ملک بدر کیا جائیگا

Hits: 0

ریاض(نیٹ نیوز) سعودی حکومت نے کرونا وائرس کی روک تھام کے لیے سخت قوانین نافذ کردیے۔عرب خبر رساں ادارے کے مطابق سعودی وزارت داخلہ نے سماجی فاصلہ رکھنے کے لیے سخت گائیڈ لائنز جاری کی ہیں جن میں مجمع اکٹھا کرنے، مالز اور دکانوں کے باہر جمع ہونے پر بھی پابندی عائد کردی گئی ہے۔سعودی وزارت داخلہ کا کہنا ہے کہ سعودی عرب میں موجود غیر ملکی شہریوں کی جانب سے قوانین توڑنے کی صورت میں انہیں ملک بدر کردیا جائے گا اور سزا پوری ہونے کے بعد بھی انہیں ملک میں کبھی داخلے کی اجازت نہیں ہوگی، ملک میں کرونا کے دوران پانچ سے زائد افراد کے ایک جگہ جمع ہونے پر پابندی عائد کی گئی ہے۔وزارت داخلہ کا کہنا ہے کہ دکان میں مقررہ تعداد سے زیادہ افراد ہونے کی صورت میں فی دکاندار کو 5 ہزار سعودی ریال جرمانہ کیا جائے گا جبکہ دوسری بار خلاف ورزی کی صورت میں جرمانہ ڈبل اور تیسری بار میں جرمانہ تین گنا کیا جائے گا۔سعودی وزارت داخلہ کے مطابق اگر نجی سیکٹر کی جانب سے ایس او پیز کی خلاف ورزی کی گئی تو اسے تین ماہ کے لیے بند کردیا جائے گا جب کہ دوسری بار خلاف ورزی کی صورت میں اسے چھ ماہ کے لیے بند کیا جائے گا۔ترجمان وزارت داخلہ کا کہنا تھا کہ اگر کوئی شخص عوامی اجتماع میں شرکت کرے گا یا پھر عوامی اجتماع کا انعقاد کرے گا تو اسے قوانین کی خلاف ورزی تصور کیا جائے گا جس پر انہیں جرمانے کے ساتھ سزائیں دی جائیں گی۔

اس خبر پر اپنی رائے کا اظہار کریں

اپنا تبصرہ بھیجیں